Servizis

La cooperative Informazione Friulana, societât editore di Radio Onde Furlane, e ufrìs dute une rie di servizis che a van plui innà di chei cjapâts dentri de ativitât radiofoniche.

Si trate di servizis che, in plui che su la esperience e su lis competencis disvilupadis de Cooperative in passe cuarante agns di ativitât, si poin ancje su la rêt che Informazione Friulana e Radio Onde Furlane a son stadis buinis di tiessi cul mont culturâl e sociâl dal Friûl, colaborant cun centenârs di operadôrs culturâi e realtâts associativis di ogni fate, promovint i artiscj de nestre Tiere, valorizant il furlan e chês altris lenghis minorizadis, stiçant la elaborazion culturâl, metint i contat personis e ideis, dant vôs a dutis e a ducj.

  • Publicitât

    Radio Onde Furlane e je une emitente comunitarie. Chest status le puarte a vê une presince di publicitât plui basse di chê che si à tes radios comerciâls cul risultât di garantî une visibilitât plui alte a ce che si promôf. Cun di plui, il personâl de Cooperative al è in stât di meti adun publicitâts unichis, par furlan o bilengâls, creativis e in linie cun chê sensibilitât etiche che e vuide la Radio fintremai de sô nassite.

  • Trasmissions, diretis e sponsorizazions

    I messaçs publicitaris a son però dome une des pussibilitâts di promozion ufiertis di Radio Onde Furlane. A seconde dal risultât che si à voie di vê, si pues di fat sielzi ancje altris stradis tant che la sponsorizazion di trasmissions dal palinsest de emitente, si pues inmaneâ des diretis radio in esterne di events che si vûl valorizâ o ancje disvilupâ des trasmissions o des seriis radiofonichis par fâ cognossi plui di dongje lis realtâts che si vûl promovi. Cul doprâ la lenghe espression de comunitât locâl e cul so jessi radio di prossimitât, Onde Furlane e je un imprest une vore bon par dâ fûr informazions di utilitât publiche e par promovi servizis, ancje di nature economiche, pe int dal Friûl.

  • Organizazion di events

    Informazione Friulana e à une esperience di passe cuarante agns inte organizazion di events. In autonomie o in colaborazion cun altris sogjets publics e privâts e à inmaneât disinis di edizions dal Premi Friûl e dal festival european des arts in lenghe minorizade Suns Europe. Ancje in gracie dal rapuart diret cun cetancj artiscj furlans, la Cooperative e je in stât di organizâ apontaments culturâi, concierts, proiezions e leturis par fruts par cont di aministrazions publichis o di realtâts associativis.

  • Servizis linguistics

    Il lavôr fat de Cooperative pe e cu la lenghe furlane dal 1980 a vuê i à permetût di disvilupâ lis cognossincis e la professionalitât par ufrî dute une schirie di servizis linguistics. In plui di vê produsût i prins prodots linguistics digjitâi par furlan tant che il Coretôr Ortografic Furlan, par agns al à garantît a diviers Comuns il personâl par gjestî Sportei linguistics di comunitât. Informazione Friulana e je in stât di fâ traduzions dal talian al furlan, revisions e consulencis linguistichis. Chestis sôs competencis, par esempli, le àn puartade a jessi sielte de ACLiF – la Assemblee de Comunitât Linguistiche Furlane – par prontâ lis regjistrazions des segretariis telefonichis par furlan dai Comuns associâts.

  • Partenariâts

    Lis competencis disvilupadis vie pai agns de Cooperative le àn puartade a jessi sielzude di partner di tantis realtâts pai lôr progjets, massime di nature culturâl (di Festintenda a Sexto ‘nplugged, di Musica in Villa a Udine Jazz). Chestis colaborazions a van plui innà dai confins dal Friûl e a interessin ancje altris comunitâts di lenghe minorizade ator pe Europe. In gracie de sô indipendence, de unicitât dai siei contignûts e dal impegn pai dirits, Radio Onde Furlane e je stade po sielzude di media partner par events tant che il Festival del Giornalismo di Roncjis di Monfalcon o Dedica Festival.