Noaltris

Furlans, internazionâi, solidaris e indipendents

Cemût che si pues lei tal so Statût, une des finalitâts primariis de cooperative Informazione Friulana – la societât editore di Radio Onde Furlane – e je «di sparniçâ e di valorizâ la lenghe e la culture de comunitât nazionâl furlane e des comunitâts linguistichis slovene e todescje dal Friûl». Chel istès, la centralitât dal furlan no à mai impedît ae Radio di vierzisi a chês altris lenghis dal teritori, chês storichis ma ancje chês puartadis de gnove imigrazion. Il fat di jessi espression di une comunitât minorizade al à invezit sburtât la Cooperative a strenzi leams di solidarietât e di colaborazion cun altris realtâts che a condividin la stesse situazion, dentri e fûr dal stât talian. Cence tignî cont di confins, ni aministratîfs e nancje mentâi.

In plui che di diviersis trasmissions radiofonichis dedicadis, la atenzion de Cooperative par chês altris comunitâts minorizadis e je testemoneade ancje di milante iniziativis puartadis indenant dilunc vie dai agns. Tra chestis si à Suns Europe, la rassegne internazionâl des arts intes lenghis minorizadis dal nestri continent che e à mot i prins pas intal 2009, la colaborazion cul setemanâl dai slovens dal Friûl udinês Novi Matajur o ancje la partecipazion ative ae nassite dal Protocol di Donostia pai dirits linguistics.

In graciis de rêt, Onde Furlane e rive pardut là che si fevele par furlan o si à a cûr l’avignî dal Friûl. Cun di fat la Radio e fâs sintî la sô vôs no dome in patrie ma ancje ator par dut il mont, massime là che a son lis comunitâts furlanis, di vecje e di gnove emigrazion. La sô e je une vocazion internazionâl naturâl e par vie de sô ativitât e je in contat cun tancj sogjets atîfs intai cjamps de informazion, dai dirits e de culture in Europe e inaltrò.

Daûr de sô nature sociâl, Informazione Friulana e à di rispuindi dome ai siei socis. No à parons e nancje santui. Dilunc vie de sô storie, la sô indipendence e la sô specificitât le àn puartade a frontâ diviers atacs e pidiments. In dì di vuê, e reste un dai ultins editôrs libars e ad in plen furlans. E je une imprese piçule ma impuartante sul plan de cualitât e de origjinalitât, dal so rapuart sinergjic cul teritori e des professionalitâts disvilupadis. Par chest e je tignude di tancj di lôr come un vêr “servizi public”.

Un imprest a servizi de comunitât

Onde Furlane no je une radio comerciâl ma comunitarie. Un status che i diven de alte percentuâl di trasmissions autoprodusudis e di contignûts metûts adun a pro de comunitât. La emitente e prodûs in maniere indipendente informazion, intratigniment e culture, e e conte il Friûl e il mont doprant la lenghe furlane.

Cun passe il 70% de sô programazion cuotidiane par furlan, la Radio e rapresente il mieç di comunicazion principâl ta cheste lenghe. Il palinsest di Onde Furlane al cjape dentri ogni dì variis emissions dal gjornâl radio, spazis di aprofondiment su la atualitât, tantis rubrichis tematichis e programs musicâi. L’ûs de lenghe furlane te plui part des sôs ativitâts, intune cu la cualitât e la varietât de musiche programade, a rapresentin un caratar specific de emitente.

La dibisugne di tratâ ogni sorte di argoment e à permetût di cjapâ sù competencis linguistichis fondamentâls par disvilupâ imprescj tant che il prin dizionari furlan – talian su supuart digjitâl e il prin coretôr ortografic furlan. Onde Furlane e je stade ancje la prime realtât a indotâsi di un sît internet dut par furlan e i à dât forme al prin magazine di informazion televisive ta cheste lenghe.

Cun di fat, la emitente e je la ativitât principâl de Cooperative ma no la uniche. Informazione Friulana e je une imprese sociâl impegnade tal svilupâ ancje altris progjets: events e manifestazions, ativitâts in cjamp editoriâl e multimediâl, servizis linguistics, cence dismenteâ i passe cincuante discs produsûts de etichete discografiche Musiche Furlane Fuarte che, intune cu lis cetantis edizions dal Premi Friûl, a àn fat di palestre e di megafon par disinis di musiciscj e di artiscj furlans.

Ta chescj passe cuarante agns di ativitât, Onde Furlane e je stade e e va dilunc a jessi un spazi di libertât, un lûc di sperimentazion, un catalizadôr di creativitât e di partecipazion, un furnidôr di servizis di utilitât publiche, un imprest di rivendicazion e di esercizi di dirits fondamentâi.

Al è dificil di cjatâ cualchidun intal mont culturâl, associatîf e politic furlan che nol vedi vût a ce fâ cu la Radio. Tra lis tantis testemoneancis che le rivuardin, une des plui significativis e reste chê dade tal 2013 dal poete Pierluigi Cappello:

«Onde Furlane e à une funzion fondamentâl: di testemoneance, di resistence e di moltiplicadôr culturâl. Se e gjoldès di une poie economiche in proporzion ae cuantitât di ideis e di energjiis che e prodûs e che e met dongje, e sarès pardabon une vore siore».
Pierluigi Cappello (2013)

Dal 1980 a vuê, diviers parcè che furlans

Radio Onde Furlane e à tacât lis sôs emissions intal Fevrâr dal 1980 ma lis sôs lidrîs a son leadis a doi fenomens precedents, o sei la rinassince culturâl e identitarie che e compagne la ricostruzion dal Friûl fiscât dal taramot intal 1976 e il disvilup des radios libaris. Al è ta cheste clime che un grup di personis, di divignince politiche e culturâl diferente, al à metût lis fondis pe nassite de emitente e de sô societât editore, la cooperative Informazione Friulana. Daûr dal dâsi adun di personis cussì diviersis e jere la volontât – riclamade tal prin document costitutîf de Cooperative – di «disvilupâ mieçs di informazion bogns pai obietîfs di autonomie e di autodeterminazion de nazionalitât furlane».

La nassite di chê che in curt e sarà cognossude tant che la “radio libare dai furlans” e à segnât une crevadure cul passât. Cun di fat e jere la prime volte che, tun panorame mediatic là che il talian al paronave, une emitente radiofoniche e meteve al centri de sô ativitât cuotidiane il fâ informazion in maniere alternative e par furlan. Bielzà dal principi Onde Furlane i à dât vôs a chei che par solit no vevin spazi ta chei altris mieçs di comunicazion: dai antimilitariscj ai ecologjiscj, dai ativiscj pai dirits ai rapresentants di disinis di grups atîfs sul teritori. Cun di plui, la Cooperative e la Radio a àn fat di pont di riferiment par mobilitazions cun disinis di miârs di adesions tant che chês par une leç statâl di tutele des minorancis linguistichis o pe nassite di une Regjon Friûl che i des ae nestre tiere une struture politiche e aministrative autonome.

Si pues dî alore che Informazione Friulana e Onde Furlane a son la espression alternative e propit par chel plui vere dal Friûl, des sôs specificitâts linguistichis, culturâls e storichis, de sô identitât plurâl e in moviment.