Il grup

  • Carli Pup

    Dal 2017 al è president de cooperative Informazione Friulana dulà che al à tacât a lavorâ tal 1999 dopo di cualchi an tant che colaboradôr di Radio Onde Furlane. Fin dal principi al è un dai redatôrs dal radiogjornâl e une des vôs de rassegne stampe. La sô passion pes nazionalitâts minorizadis lu à puartât ancjemò tal 2000 a cjapâ in man Internazionalitari, il boletin dedicât aes nazions cence stât de Europe.
    Vie pai agns al à curât o coordenât il lavôr par diviers programs de Radio, tant che Sul troi des contis, Lasimpon e Irrintzi. Al è il referent pai servizis linguistics di Informazione Friulana. Al fâs di coordenadôr par diviers bants e progjets puartâts indenant de Cooperative tant che la rassegne Suns Europe.

  • Mauro Missana

    Dal 2008 al è il diretôr responsabil di Radio Onde Furlane. Za dai agns Novante al è diretôr dal palinsest, in plui di jessi zaromai di agns un dai membris dal Consei di Aministrazion di Informazione Friulana. Dipendent de Cooperative dal 2004, al veve dut câs tacât a colaborâ cu la Radio bielzà di prime. Al à tacât a fâ radio za te seconde metât dai agns Setante a torzeon jenfri Friûl e Slovenie e al è une des vôs storichis de emitente, sei par chel che si riferìs ae programazion musicâl (la sô trasmission Tommy’s Magazine e je une di chês che e va indenant cun continuitât di plui agns) che pe part redazionâl. Al cure il Dret e Ledrôs, il program di aprofondiment gjornalistic de sabide, in plui di jessi un dai condutôrs dai programs cuotidians Ator Ator e Ce Fâ.

  • Margherita Cogoi

    Dopo cualchi esperience come vôs par programs radiofonics e à tacât a lavorâ par Informazione Friulana tal 2019 e fin dal principi e je une des vôs che a animin il radiogjornâl di Onde Furlane. Cun di plui, dentri dal palinsest de Radio, e cure ancje diviersis trasmissions di aprofondiment. Intal 2020 e je deventade une dai membris dal Consei di Aministrazion de cooperative editore di Onde Furlane. Cul 2021 e à cjapât in man ancje il coordenament dai zovins che a davuelzin il servizi civîl dentri di Informazione Friulana.

  • Pauli Cantarut

    Za president di Informazione Friulana dal 2009 al 2017 e a dilunc membri dal Consei di Aministrazion de Cooperative, al à scomençât a lavorâ a Onde Furlane ancjemò tal 1994. Al è une des vôs storichis de emitente, dulà che in dì di vuê al cure diviers programs tant che La Crame, Internazionâl e Teatro Invisibile, in plui di jessi un dai condutôrs dai programs cuotidians Ator Ator e Ce Fâ. Tai siei cuasi trente agns di ativitât, dut câs, al à viodût di cetantis trasmissions e di cetancj progjets. Par agns, par esempli, al à fat di coordenadôr dal Premi Friûl e de golaine musicâl editade de Cooperative, Musiche Furlane Fuarte. Al è un dai ideadôrs di Suns, il festival des arts in lenghe minorizade che dal 2016 al è deventât Suns Europe.

  • Rudy Citossi

    Dopo di une lungje esperience lavorative a Vignesie, tal 2021 al è tornât in Friûl par lavorâ cun Informazione Friulana. Al è il responsabil comerciâl de Cooperative e, ta chê viste, al fâs di riferiment pai diviers servizis che Informazione Friulana e ufrìs. La sô presince però e je impuartante ancje par altris ativitâts leadis ae logjistiche interne e par cierts progjets che la Cooperative e puarte indenant sul teritori.

  • Ferdinando Passone

    Zaromai di diviers agns al fâs di responsabil de aree tecniche e informatiche di Informazione Friulana e, ta cheste suaze, al coordene ancje la ativitât di regjie di Onde Furlane. Al è jentrât intal organic de Cooperative tal 2004 e sul imprin al à lavorât inte redazion gjornalistiche de radio, dulà che ogni tant, se al covente, al torne a dâ une man. Vie pai agns al à davuelt ancje incarghis di nature aministrative de Cooperative, al à fat part dal Consei di Aministrazion di Informazione Friulana e tra 2008 e 2009 al à fat ancje di president.

  • Marianna Tonelli

    Dopo di vê completât il so percors scolastic si à svicinade a Radio Onde Furlane cu lis ideis une vore claris su ce che e voleve fâ, ven a dî colaborâ cu la redazion gjornalistiche. Dopo di une fase formative partide tal 2020, sul prin tacâ dal 2021 e à scomençât a lavorâ cu la redazion e, alternant cheste ativitât cu lis sôs esperiencis intal forest, cumò e va dilunc a fâlu in forme stabile. In dì di vuê e je une des vôs dal radiogjornâl e de rassegne stampe che si sint cun plui frecuence.

  • Serena Fogolini

    Operadore linguistiche e culturâl impegnade in milante ativitâts, vie pal 2022 e à tacât a colaborâ cuntune cierte continuitât cun Onde Furlane. La sô ativitât si davuelç massime dentri de redazion culturâl e, in dì di vuê, e je une des vôs che si puedin scoltâ te conduzion dai programs cuotidians Ator Ator e Ce Fâ.

  • Raffaella Corrias

    Lavoradore autonome, e colabore cun Informazione Friulana dal 2017. Dentri de Cooperative si ocupe di ducj i aspiets leâts ae contabilitât ma e davuelç ancje altris incarghis di responsabilitât che a rivuardin ancje lis ativitâts che Informazione Friulana e puarte indenant sul teritori, tant che la rassegne des arts in lenghe minorizade Suns Europe.

  • Marta Savorgnan

    Dopo di un tirocini in Radio a cjaval tra il 2020 e il 2021, e à cjapât in man i canâi sociâi de Cooperative. Tant che responsabile des rêts sociâls de emitente, e je jê che e cure i contignûts dai profîi che Onde Furlane e à su Facebook e su Instagram. No mancje dut câs di dâ il so contribût ancje a altris ativitâts de Cooperative. Tra lis altris, e viôt dal coordenament de rêt di colaboradôrs volontaris de Radio.

  • Marco Stolfo

    Al colabore cun Informazione Friulana zaromai dal 2010, dopo di vê za dât une man in Radio tra il 1995 e il 2003. Ta cheste suaze al partecipe sei ae ativitât radiofoniche di Onde Furlane come condutôr di programs tant che Babêl Europe, il cuindisinâl di musiche e informazion dedicât aes nazionalitâts minorizadis europeanis, sei come curadôr di progjets di nature divierse tant che il libri La mê lenghe e sune il rock… e no dome chel. Al cuvierç la incarghe di adet stampe de Cooperative.

  • Enrico Turloni

    Gjornalist professionist che al colabore cun Onde Furlane dal 2007. Dopo di esperiencis lavorativis par impuartantis redazions gjornalistichis e televisivis ator pe Italie, al è tornât in Friûl dulà che, in plui che pe Radio, al lavore ancje par altris realtâts informativis dal teritori. A Onde Furlane al è il responsabil de redazion sportive – là che al cure e al condûs Schiribicilu! – e al da un contribût impuartant in redazion, massime pal program di aprofondiment gjornalistic de sabide Dret e Ledrôs. Al è ancje un dai plui atîfs intes diretis in esterne de Radio: dai events sportîfs – sôs lis primis radiocronichis par furlan in diviersis dissiplinis sportivis – fintremai aes fieris dal agroalimentâr.

  • Antonio Valencia

    Di divignince colombiane, si à svicinât al ambient de Radio par vie che tal 2019 al à davuelt la ativitât di servizi civîl dentri de cooperative Informazione Friulana. Achì al à cjapât simpri plui confidence cu la strumentazion tecniche de emitente e al à scomençât a stâi daûr ae regjie. Cumò, tant che lavoradôr autonom, al è un dai tecnics di regjie che a permetin ae emitente di lâ in onde ogni dì.

  • Lorenzo Fabbro

    Al à colaborât cu la Radio za a partî de fin dai agns ‘90 e tal 2009 al è deventât soci di Informazione Friulana cun chê di dâ une man a di une realtât calcolade centrâl pe promozion de lenghe furlane e par sburtâ la riflession sul autoguvier dal Friûl. Ta cheste suaze tal stes an al è ancje jentrât pe prime volte tal Consei di Aministrazion, funzion che al à lassât intal 2014 par vie che al jere stât clamât a davuelzi une incarghe istituzionâl publiche leade ae lenghe furlane. Rivade insom chê esperience, tal 2020 al è tornât a fâ part dal CdA de Cooperative cul rûl di vicepresident.

  • Alessandro Ciriani

    Al è soci di Informazione Friulana dai agns Novante dal secul stât cuant che si veve fat dongje ae Cooperative sburtât de pussibilitât di impegnâsi par mieç di cheste realtât pe valorizazion de identitât specifiche dal Friûl e pe tutele dal ambient. Temis che lu puartin ancjemò a fâ sintî la sô vôs dentri di diviers programs che Onde Furlane e dediche a chestis tematichis. Zaromai di agns al è un dai membris dal Consei di Aministrazion de Cooperative.